حضرت شیخ علاؤ الدولہ سمنانی رحمتہ اللّٰه علیہ
شیخ علاؤ الدین سمنانی سلطان سید ابراہیم کے معاصر اور نہایت محبوب تھے، اور سلوک میں غوث العالم محبوبِ یزدانی سلطان سید اشرف جہانگیر سمنانی قدس سرہ النوارنی کے پہلے استاذ تھے، سمنان کی مشہور خانقاہ سکاکیہ سلطان سید ابراہیم نے انھیں کے لیے تعمیر کرائی جس کو سولہ سال تک شیخ رکن الدین علاؤالدولہ سمنانی نے آباد رکھا، اس خانقاہ میں ہمہ وقت ہزاروں طالبان معرفت کا ہجوم رہتا تھا، اور بہت سے طالبان راہِ سلوک اس خانقاہ سے تعلیم وتربیت حاصل کرکے روحانیت کے بلند مقام پر فائز ہوئے۔
حضرت شیخ علاؤالدولہ کے زہدوتقویٰ کا اندازہ اس واقعہ سے بخوبی لگایا جاسکتا ہے کہ ایک دن بادشاہ نے آپ کی خدمت میں ہرن کا گوشت تحفہ میں پیش کیا اور کہا کہ یہ گوشت شکار کا ہے اس کو آپ تناول فرمائیں ، شیخ فرماتے ہیں کہ اس وقت مجھ کو امیر نوروز کی یہ حکایت یاد آگئی کہ وہ خراسان میں تھا اور میں مشہد کی زیارت کے لیے طوس گیا تھا، وہ پچاس سوار کے ساتھ میرے پاس آئے اور کہاکہ جب تک آپ خراسان میں رہیں میرے ساتھ رہیں، ان کے اصرار پر میں چند روز ساتھ رہا ، وہ ایک دن دو خرگوش لائے اور کہا کہ میں نے خود ان کو شکار کیا ہے، آپ ان کا گوشت تناول فرمائیں ۔ میں نے کہا: ”میں خرگوش کا گوشت نہیں کھاتا“ اس لیے کہ بقول حضرت امام جعفر صادق رحمتہ اللّٰه علیہ”خرگوش حرام ہے“ اور جب ایک بزرگ نے اسےحرام سمجھا ہے تو اس کا نہ کھانا ہی بہتر ہے، وہ چلے گئے اور دوسرے دن ایک ہرن کا گوشت لائے اور کہا کہ ”اس کو میںنے خود شکار کیا ہے اور جس تیر سے مارا ہےاس کو میں نے خود بنایا تھا، اور جس گھوڑے پر بیٹھ کر شکار کیا ہے وہ میرے گھر میں پیداہوا تھا“ میں نے جواب دیا کہ ” یہ بات مولانا جمال الدین کی طرح معلوم ہوتی ہے“ کہ ہمدان میں ایک مغل امیر ان کا بڑا معتقد تھا وہ ایک دن دو مرغابیاں لایا اور کہا کہ ” ان کو میرے باز نے پکڑا ہے یہ حلال ہیں“ مولانانے جواب دیا کہ “مرغابی پر اعتراض نہیں مگر سوال یہ ہے کہ تیرے باز نے کل کس بڑھیا کا مرغ کھالیا تھا جس کی بدولت آج اس کو پکڑنے کی طاقت ہوئی، یہ مرغابیاں لے جا میرے کھانے کے قابل نہیں“ شیخ فرماتے ہیں کہ یہ قصہ مجھے یاد آیا اور میں نے اس ہرن کا گوشت نہیں کھایا ؛ لیکن درویشوں کو اس کے کھانے کی اجازت دیدی اس لیے کہ وہ بڑی عقیدت سے لایاتھا۔
حضرت شیخ علاءالدولہ کے علاوہ بہت سے اولیائے کاملین اس وقت سمنان میں موجود تھے، جن میں ایک مجذوب شیخ ابراہیم بھی تھے جن کی بڑی شہرت تھی۔
For Contact Us
Go to Contact Page
or
Mail:contact@makhdoomashraf.com
Cal:+91-9415721972